पोखरा — समय ठिकठाक हुँदो हो त पोखराकी ट्रेकिङ गाइड हिरा मल्ल अस्ट्रेलियाका पदयात्री पर्यटकको समूह लिएर यति बेला घोरेपानी–पुनहिलमा हुन्थिन् । उनको आफ्नै कम्पनी मल्ल सिस्टर्स वुमन एडभेन्चर गाइड्सबाट पदयात्रामा आउन लागेका ती पर्यटकले हालैको प्रदर्शनपछि नेपाल अशान्त बनेको भन्दै ‘बुकिङ’ रद्द गरेका छन् ।
पदयात्रामा आउने पर्यटक बिमा गरेर मात्रै नेपाल आउँछन् । अहिलेको अवस्थामा विदेशी बिमा कम्पनीले पर्यटकको बिमा गर्न नमानिरहेको केही पर्यटन व्यवसायीहरूले बताए । बिमा गर्नेले महँगो रकम तिर्नुपरिरहेकोले पनि बुकिङ रद्द भइरहेको र नयाँ इन्क्वायरी पनि कम आएको आचार्यले सुनाए । ‘आउन चाहने पर्यटकले आफ्ना दूतावासमा सोधपुछ गरिरहेका छन्, केही देशका दूतावासले ट्राभल एड्भाइजरी जारी गरेकोले पनि बुकिङ रद्द हुने र होल्ड हुने भइरहेको छ,’ उनले भने ।
पोखराका ६ वटा होटल, रिसोर्ट, रेस्टुरेन्टमा प्रदर्शनकारीले आगजनी र तोडफोड गर्दा झन्डै ३ अर्बको क्षति भएको संघको अनुमान छ । कोभिडअघि पर्यटकीय मौसममा पोखराका होटलमा ९८ प्रतिशतसम्म अक्युपेन्सी रहेको सुवेदीले स्मरण गरे । ‘यो वर्ष कोभिडअघिकै अवस्थामा फर्किन्छौँ भन्ने थियो,’ उनले भने, ‘माओवादी युद्ध, जनआन्दोलन, भूकम्प, नाकाबन्दी, कोरोनापछि पर्यटन क्षेत्रलाई फेरि अर्को झड्का लागेको छ । आन्दोलन भइरहने हो भने उठ्न गाह्रो छ ।’ नेपालमा दुई दिनमै आन्दोलन सकिएको र अब पर्यटकका लागि कुनै असुरक्षा नरहेको सन्देश अन्तर्राष्ट्रिय बजारमा पुर्याउनुपर्ने उनी सुझाउँछन् ।
आन्दोलनकै बेला पनि पर्यटक बसलाई आन्दोलनकारीले स्वागत गरेको भिडियो भाइरल भएको थियो । यस्ता दृश्यहरूले पर्यटकहरू आन्दोलनमा पनि असुरक्षित हुँदैनन् भन्ने सन्देश दिन सक्ने पर्यटन व्यवसायीको भनाइ छ ।
नेपाल पर्यटकका लागि सुरक्षित रहेको र अब पुरानै अवस्थामा फर्किएको सन्देश पुर्याउनुपर्नेमा लामिछानेले जोड दिए । अन्नपूर्ण संरक्षण क्षेत्रमा आर्थिक वर्ष ०८१/८२ मा २ लाख ७८ हजार १ सय १३ पर्यटक पुगेका थिए । तीमध्ये १ लाख ५७ हजार ७ सय ८६ भारतीय हुन् । यो अंकले पर्यटकका लागि नेपाल सुरक्षित छ भन्ने सन्देश दिन सके ठूलो संख्यामा पर्यटक भित्र्याउन सकिन्छ भन्ने बुझाउँछ ।
