गाजामा भोकमरी भयावह, करिब दुई करोड जनसंख्याले गम्भीर खाद्य सङ्कट भोग्दै

गाजा सहर — प्यालेस्टिनी शरणार्थीका लागि कार्यरत संयुक्त राष्ट्र सम्बन्धित निकाय युएनआरडब्लुए ले सोमबार जानकारी दिँदै गाजामा कार्यरत आफ्ना केही कर्मचारीहरू भोकको कठोर पीडामा परेको बताएका छन् । संस्थाले ‘भोकका कारण गम्भीर पीडा भोगिरहेको’ भन्ने मार्मिक सन्देशहरू प्राप्त भइरहेको जनाएको छ ।
गाजाका करिब दुई करोडभन्दा बढी जनसङ्ख्या हाल गम्भीर खाद्य सङ्कटमा परेका छन् । चिकित्सक, नागरिक सुरक्षाकर्मी र अन्तर्राष्ट्रिय मानवसेवा संस्थाहरूले पछिल्ला दिनहरूमा कुपोषणका घटना तीव्र रूपमा बढिरहेको जानकारी गराएका छन् ।
युएनआरडब्लुएले एक सार्वजनिक सन्देशमार्फत उल्लेख गरेको छ, गाजामा अत्यावश्यक वस्तुको अत्यधिक अभावका कारण खाद्यान्नको मूल्य चालीस गुणासम्म बढेको छ ।
तर, गाजाको बाहिर रहेका हाम्रो गोदाममा रहेको राहत सामग्रीले तीन महिनाभन्दा बढी समयका लागि सम्पूर्ण जनतालाई खान पुग्ने मात्रामा पर्याप्त भण्डारण छ ।
संस्थाले थप लेखेको छ, गाजामा भोगिनु परिरहेको पीडा मानव निर्मित हो र यसलाई अब रोकिनुपर्छ । नाकाबन्दी हटाइनुपर्छ र मानवीय सहायता सुरक्षापूर्वक, पर्याप्त मात्रामा गाजामा प्रवेश गरिनु आवश्यक छ ।
गत चैत १९ गते युद्धविराम वार्ता निष्फल भएपछि इजरायलले गाजामाथि पूर्ण नाकाबन्दी लागू गरेको थियो । त्यसपछि करिब दुई महिनासम्म कुनै सामग्री प्रवेश गर्न नदिइएपछि, वैशाखको अन्त्यतिर सीमित रूपमा केही गाडीहरू प्रवेश गर्न दिइएको थियो ।
नागरिक सुरक्षा निकायले आइतबार जानकारी दिँदै पछिल्लो साताभित्र ‘गम्भीर भोकमरी र कुपोषणका कारण तीन नवजात शिशुहरूले ज्यान गुमाएको जनाएको छ ।
स्वास्थ्य मन्त्रालयका अनुसार शनिबार देखि आइतबारको २४ घण्टाभित्र मात्र भोककै कारण १८ जनाको निधन भएको छ । अल–शिफा अस्पतालका निर्देशक डा. मोहम्मद अबु सलमियाले भने, एक वर्षभन्दा कम उमेरका बालबालिकालाई दूध नपुग्दा उनीहरूको तौल निकै घटिरहेको छ, प्रतिरक्षा क्षमता कमजोर हुँदै गइरहेको छ, जसका कारण उनीहरू विभिन्न रोगका शिकार बन्न पुगेका छन् ।
इजरायली पक्षले भने गाजामा शिशुहरूका लागि आवश्यक पोषिलो दूध र खाद्यवस्तु पठाउनेमा कुनै रोकटोक नरहेको जनाएको छ । इजरायली रक्षा मन्त्रालय अन्तर्गतको नागरिक मामिला हेर्ने निकायले जानकारी दिँदै गाजामा दुई हजार टनभन्दा बढी शिशु खाद्य वस्तु पठाइसकिएको बताएको छ, तर त्यो कुन अवधिमा पठाइएको हो भन्ने स्पष्ट गरिएको छैन । मन्त्रालयले भनेको छ, हामी अन्तर्राष्ट्रिय संस्थाहरूसँग मिलेर तत्काल शिशुका लागि आवश्यक पोषण सामग्री ढिलाइ नगरी पठाउन समन्वय गर्न आग्रह गर्छौं ।
सन् २०२३ मा हमासको आक्रमणपछि सुरु भएको यस युद्धमा इजरायली तथ्याङ्कअनुसार एक हजार २१९ जनाको ज्यान गएको थियो, जसमा अधिकांश सर्वसाधारण थिए ।
त्यसपछि इजरायली सैनिक कारबाहीमा गाजाको स्वास्थ्य मन्त्रालयका अनुसार ५९ हजार २९ जनाले ज्यान गुमाएका छन्, जसमध्ये धेरैजसो सर्वसाधारण छन् ।