पवन यादव
बारा– विगत १० दिन देखी बाराको कलैयाबाट अपहरणमा परेकी १२ वर्षिया बालिकाको बिहिवार बाराको डुमरवानाबाट प्रहरीको सहयोगमा सकुशल उद्धार गरिएको छ ।
लामो समय देखी कोठामा थुनेर राखिएकी ती बालिका बिहिवार अपहरणकारीहरुको फन्दाबाट फुत्केर बाहिर निस्कीन सफल भएकी छिन ।
फुत्केर बाहिर निस्कीएकी बालिकालाई अस्वभाविक हाउभाउमा देखेपछि स्थानीयले बालिका बारे प्रहरीलाई सुचना दिएका थिए । सूचना पाए लगतै पुगेको प्रहरीले फोटो तथा हुलिया ब्योहोराबाट किशोरीको पहिचान गरेको थियो ।
त्यसपछि उद्धार गरिएकी बालिकालाई जिल्ला प्रहरी कार्यालय बारा परिसरमा रहेको महिला तथा बालबालिका सेवा केन्द्र कलैयाको जिम्मा लगाईएको प्रहरी श्रोतले जनाएको छ ।
महिला सेलको निगरानीमा रहेकी ती बालिकासंग घटनाबारे सोधपुछ भईरहेको जिल्ला प्रहरी कार्यालय बाराका प्रवक्ता डिएसपी राजेश थापाले जानकारी दिए ।
‘अहिले सम्म बालिकाबाट खासै कुरो खुल्न सकेको छैन,’ उनले भने ‘खुलाउने प्रयास भईरहेको छ, कुरो नखुलेसम्म केही भन्न मिल्दैन ।’ तर ती बालिकालाई डुमरवानाबाट फेला पारिएको उनले बताए ।
प्रहरीले हुलिया ब्योहोराको आधारमा बालिकालाई फेला पारी जिल्ला प्रहरी कार्यालयमा ल्याएको उनले जानकारी दिए ।
बालिकाको उद्धार गर्न प्रहरीमा निवेदन दिएका अभिभावकले ८ दिन सम्म आफ्नो तरिकाले खोज तलाश जारी राखेका थिए ।
पीडित परिवारले खोज तलाशको क्रममा लुकेर अभिभावकलाई फोन सम्पर्क गरेकी कक्षा ५ मा पढने ती बालिकाले आफु कोठामा थुनिएको बताएकी थिईन ।
अपहरणकारीले आफुलाई कुटपिट गर्नुका साथै शारिरिक तथा मान्सिक यातना दिएको कुरा ती बालिकाले भकानिदै फोन मार्फत अभिभावकालाई जानकारी गराएकी थिईन ।
प्रहरीलाई फोन आएको नम्बर र रेकर्ड गरिएको भ्वाईस क्लिप्स उपलब्ध गराउदा समेत प्रहरीले बेवास्ता गरेपछि झन्न तनाव बढेको अपहरितका अभिभावकले बताएका छन ।
अपहरित छोरीको खोजतलाशमा सहयोग गरिदिन पत्रकारसंग गुहार मांगेको तीनका अभिभावकले बताएका छन ।
घटनाबारे जानकारी पाएपछि पत्रकारले फोन मार्फत प्रहरी अधिकारीसंग घटनाबारे सोधपुछ गर्न थालेपछि प्रहरीले बालिकाको खोजतलाशमा चासो देखाएको थियो ।
हल्ला गर्दा वा समाचार सार्वजनिक बालिकालको ज्यान जाने सम्भावना प्रबल देखिएपछि सामाचार रोकेर प्रहरीलाई सहयोग गरिएको ती पत्रकारले बताएका छन ।
बालिकाको सकुशल उद्धार हुनुमै हम्रो सफल्ता रहेको ती पत्रकारले प्रतिकिया दिएका छन ।
