मधेश प्रदेशमा डुबेरै ३ वर्षमा ५४२ को मृत्यु

हरेक वर्ष डुबेर बालबालिकाको मृत्यु हुने गरे पनि यसमा न स्थानीय तह न त प्रदेश सरकार वा संघको ध्यान देखिन्छ । यही हेलचेक्र्याइँले हरेक वर्ष डुबेर मृत्यु हुने संख्या बढ्दो छ । २०७९/०८० मा १५५ जनाको डुबेर मृत्यु भयो । ०८०/०८१ मा यो दरमा १९ प्रतिशतभन्दा धेरैले वृद्धि भएर १८५ पुग्यो । ०८१/०८२ को १० महिनामा भने यो दर अघिल्लो वर्षभन्दा ९ प्रतिशतभन्दा धेरैले बढेर २०२ पुग्यो ।

मधेश प्रदेश प्रहरी कार्यालय जनकपुरका अनुसार बाढीले बगाएका, खोलामा हाम फालेका घटना एकाध भए पनि धेरैजसो खाल्डाखुल्डीमा जमेको पानीमा र केही पोखरी वा जलाशयमा डुबेर बालबालिकाको मृत्यु हुने गरेको छ । ‘डुबेर बालबालिकाको ज्यान जाने घटना मधेश प्रदेशमा ठूलै समस्या बनेको छ ।’ बाढी, पहिरो, शीतलहर, गर्मी, आगलागी, हावाहुरी लगायतलाई विपद् भन्दै मधेशका १ सय ३६ वटै पालिका र प्रदेश सरकारले पूर्वतयारी गरेको देखिन्छ । तर, पोखरी, नदी, खोल्सा, ठेकेदारले जथाभावी खनेर अलपत्र छाडेका गहिरो खाल्डोमा डुबेर मृत्यु हुनेलाई क्षतिपूर्ति त के तिनै तहका सरकारले प्राथमिकतामा राखेको देखिदैन । डुबेर मृत्युु हुने घटना राेक्न तिनै तहका सरकार गम्भीर हुनु पर्नेमा सराेकारवालाकाे जाेड छ ।