काठमाडौं– धारिलो हतियार प्रहार गरी संघिय राजधानी काठमाडौंको गैह्रीगाउँमा एकै परिवारका तीन सहित चार जनाको शुक्रवार राती हत्या भएको छ ।
गैह्रीगाउँको दिव्य सःमिलभित्र धारिलो हतियार प्रहार भएको अवस्थामा चार जनाको शव भेटिएको उपत्यका प्रहरीले जनाएको छ ।
हत्या हुनेहरूमा दोलखा घर भएका करिब ५५ वर्षीय कुमार भुजेल, उनकी श्रीमती शुभद्रा वाइवा र कुमारकी आमा करिब ७० वर्षीया सुमित्रा भुजेल र मोरङ घर भएका करिब १९ वर्षीय नवीन राई रहेको उपत्यका प्रहरी कार्यालयका प्रमुख एआईजी दीपक थापाले जानकारी दिए ।
चारै जना सोही सःमिलमा कार्यरत थिए । उनीहरूको शरीरका विभिन्न ठाउँमा धारिलो हतियार प्रहार भएको गहिरो घाउचोट रहेको एआईजी थापाले जानकारी दिए । घटनास्थलमा प्रहरी टोली पुगी सकेको र घटनाबारे थप अनुसन्धान सुरु गरिएको उपत्यका प्रहरीले जनाएको छ ।
