बारा– बाराको निजगढ नगरपालिका र जितपुर सिमरा उप महानगरपालिकाको छुट्टाछुट्टै स्थानमा बुधवार भएको आगलागीमा परेर करीब ६ लाख रुपैयाँ बढीको धनमाल जलेर नष्ट भएको छ ।
निजगढ नगरपालिका वडा नम्बर ८ अस्सीबिघा स्थानमा लगाईएको उखु खेतमा अचानक आगलागी हुदा करीब ५ लाख मुल्य बराबरको एक विगहा क्षेत्रफलको उखु जलेर नष्ट भएको जिल्ला प्रहरी कार्यालय बाराका प्रवक्ता डिएसपी राजेश थापाले जानकारी दिए ।
स्थानीय राम खत्रीको उक्त उखु खेतमा भएको आगलागीलाई स्थानीय वासिन्दा, प्रहरी र दमकलको सहयोगमा नियन्त्रणमा लिईएको उनले जानकारी दिए ।
आगलागी कसरी भएको हो खुल्न नसकेको र घटनाबारे थप अनुसन्धान सुरु गरिएको प्रहरीले जनाएको छ । यसैगरी जितपुर सिमरा उपमहानगरपालिका वडा नम्बर ७ शान्ती टोल बस्ने उजर देवानको घरमा आगलागी हुदा करीब एक लाख रुपैयाँ मुल्य बराबरको धनमाल जलेर नष्ट भएको छ ।
अचानक भएको आगलागीमा परी घर भित्र राखिएको खाट, भाडाकुडा, लताकपडा, अन्नपात लगायतका मालसामान जलेर नष्ट भएको प्रहरीले जनाएको छ ।
कारण खुल्न नसकेको आगलागीलाई स्थानीय वासिन्दा, प्रहरीको सहयोगमा नियन्त्रणमा लिईएको र घटनाबारे थप अनुसन्धान भईरहेको प्रहरीले जनाएको छ ।
