वर्षाको पानीको कारण बारामा घर भत्किने क्रम अझै रोकिएन दर्जनौं घर तथा सरकारी कार्यालय डुबानमा

गढी न्यूज
गढी न्यूज पाठक संख्या - 1k
2 मि. पढ्न लाग्ने समय

बारा–विगत केही दिन देखि परेको अविरल वर्षाका कारण जमेको पानीले सल्किएर बारामा घर भत्किने क्रम अझै रोकिएको छैन । मंगलवार विहान मात्र सिम्रौनगढ नगरपालिकामा एक घर भत्किएको छ ।

सिम्रौनगढ नगरपालिका ५ सानो ईटवाल निवासी अयुब अंसारीको कच्ची घर वर्षाको पानीले सल्किएर भत्केको जिल्ला प्रहरी कार्यालय बाराका प्रवक्ता गौतम मिश्रले जानकारी दिए ।

खपडाको छानो र बासको भित्ताले बनेको घर भत्कएर करीब एक लाख रुपैयाँ भन्दा बढीको क्षति भएको अनुमान गरिएको उनले बताए ।

घर भत्किएर मानविय क्षति नभएपनि अन्सारी परिवारको विचल्ली भएको छ । परिवारका ६ जना सदस्य अरुको घरमा आश्रय लिन बाध्य भएका छन ।

यस अघि पनि बाराको विभिन्न पालिकामा गरी ११ वटा घर भत्किएर लाखौंको नोक्सान भएको प्रहरीले जनाएको छ । पानीको भेल आएर ईलाका प्रहरी कार्यालय सिम्रौनगढ र ईलाका प्रहरी कार्यालय निजगढको कम्पाउण्डवाल भत्किएको डिएसपी मिश्रले जानकारी दिए । यसैगरी डुबानको कारण प्रहरी चौकी बसतपुरमा समेत क्षति पुगेको उनले बताए ।

वर्षाको पानी चारैतिर स्थिर भएपछि प्रहरी चौकी मटिअर्वाको कार्यालय प्रवेश गर्ने सडक समेत डुबानमा परेर प्रहरी कर्मचारी तथा सेवाग्राहीलाई आवतजावतमा समस्या उत्पन्न भएको उनले बताए ।

वर्षाको पानी घरभित्र पसेपछि बारामा दर्जनौं घर डुबानमा परेका छन । घर डुबानमा परेर पीडित परिवार समस्या झेलिरहेका छन ।

अहिले पनि वर्षाको पानी घरबाट निकाल्न नसकिएको कलैया उपमहानगरपालिका १६ उत्तरझिटकैयाकी पीडित मान्ती गिरीले बताईन ।

पक्की घर डुबानमा परेपछि उनी परिवार सहित आफन्तको घरमा आश्रय लिन बाध्य हुने परेको बताईन । वर्षाको पानीले उत्तरझिटकैयाकै भट्टराई भनिने हरेन्द्र पटेलको फुसको घर वर्षाको पानी पसेर हिलाम्य बनेको छ ।

पानीले सल्किएर घर भत्किने अवस्थामा आईसकेको उनले जानकारी दिए । अहिले घरमा बस्न, खान र सुत्न समस्या भएको उनले बताए ।

उनीहरु जस्तै स्थानीय भुनेश्वर कुशवाहा, राधेशंकर पटेल, चन्दन सहनी, रघुनाथ पटेल सहित आधा दर्जन बढी परिवार बस्ने घर डुबानमा परेको स्थानीयले बताएका छन ।

डुबानबाट घर भित्र राखिएको खाद्यान सहितका मालसामान भिजेर बिग्रेको पिडितहरुले बताएका छन ।

सर्वसाधारणको मात्र नभई वर्षाको पानीले सरकारी कार्यालय रहेको भवन तथा वरीपरीको सडक समेत डुबानमा परेको प्रहरीले जनाएको छ ।

यो लेख शेयर गर्नुहोस