सप्तरी– पुर्व–पश्चिम हुलाकी राजमार्ग अन्तर्गत सप्तरीको राजगढ गाउँपालिका–५ मलेकपुरमा शनिवार बिहान भएको मोटरसाईकल दुर्घटनामा ३ जनाको मृत्यु भएको छ ।
मृत्यु हुनेमा हनुमाननगर कंकालिनी नगरपालिका–३ बस्ने ३० वर्षीय पप्पु यादव, सोही ठाउँका २६ वर्षीय सन्दीप यादव र बुच्चु भनिने २५ वर्षका रञ्जीत यादव रहेको प्रहरीले जनाएको छ ।
दुर्घटनामा परी दुबै मोटरसाईकलमा सवार तीनै जनाको घटनास्थलमै मृत्यु भएको जिल्ला प्रहरी कार्यालय सप्तरीले जनाएको छ ।
भारदहबाट पथरगाडा तर्फ जन्तीमा हिडेको प्रदेश १–०२४१ प २२९६ नम्बरको मोटरसाइकल र प्रदेश १ –०२०४१ प ९५२४ नम्बरको मोटरसाइकल ओभरटेक गर्ने क्रममा दुबै मोटरसाईकल एकापसमा ठोकिदा उक्त दुर्घटना भएको हो ।
मृतकको शव परीक्षणको लागी प्रादेशिक अस्पतालमा ल्याईएको र दुर्घटनामा संलग्न दुबै मोटरसाईकललाई नियन्त्रणमा लिएर दुर्घटनाबारे थप अनुसन्धान सुरु गरिएको सप्तरी प्रहरीले जनाएको छ ।
